Ataun.info

Flickr.com plataforma desberdinetan, argazki eta bideoak on-line komunitatean elkarbanatzeko webgune bat da. Orokorrean Web 2.0-ko nabigazio adibide berri bat bezala kontsideratzen da.

Flickr-ek aukera ematen du argazki eta bideoak munduko beste edozeinekin partekatzeko eta blogari askok erabiltzen dute argazki biltegi bezala. Flickr-ek ere, Web 2.0ko beste programa askok bezala, etiketak erabiltzen ditu argazkiak izendatzeko.

Duela gutxitik Flickr-eko erabiltzaileek badute beraien Ataungo argazkiak biltzen dituen talde bat, nahi duenak bertan jar ditzake Flickr-eko kontuak dituen irudiak. Hona adibide batzuk:

Bertan aurki ditzakegu, adibidez, Gipuzkoa Kulturak bildutako argazki zaharretako batzuk, duela gutxi aurkeztutako ‘GureGipuzkoa.net’ zerbitzuaren bidez.

Etorkizunean argazki bilduma ederra egingo dugulakoan, zuen ekarpenen zain geratuko gara.

‘Ataun’ taldea Flickr-en | Lotura
GipuzkoaKultura Flickr-en | Lotura
GureGipuzkoa.net | Lotura

Argazkia: Andoni Munduate.

Heldu da Zirkoa Atauna. Gaur asteazkena, hilak 22, Fischer zirkoak herriko ume eta familientzako emanaldia eskainiko du arratsaldeko 6etan, horretarako San Martingo Plaza Berrian jaso duten karpa batean.

Zirko familiarra omen da, belaunaldiz belaunaldi pailazo, ekilibrista nahiz animaliekin ikusentzuleak alaitzen dituena. Ikuskizunak ordu eta erdi inguruko iraupena izango du, eta sarrerak eskuragarri izango dira bertan 7 euroren truke.

Arkaitz Apalategik Goierriko Hitzan:

Euskal Herriko Txirrindulari Itzuliko estreinako etapa prestatzeko lanetan buru-belarri dabil Joan Arrondo (Ataun, 1955). Kartelak jarri, bidegurutzeetan egoteko jendea lotu, lanik ez zaio falta eta telefonoa ere dantzan dabilkio egun osoan. «Ez didate arnasarik hartzen uzten», dio umorez. Horrelako etapa bat antolatzeak lan handia badu ere, «gustura» ari dela dio Arrondok, eta astelehena iristeko gogoz dago.

Irakurri elkarrizketa osoa HITZAn

Goierriko Hitza  |  Link

2009ko martxoaren 30eko Udal Agiria:

Datorren igandean, hilak 12, Aberri Eguna ospatuko da Euskal Herri osoan. Azken urteetan egin ohi dugun bezala, aurten ere gure herrian ospatzeko asmoa daukagu. Ospakizuna eguerdiko 11 eta erdietan hasiko da udaletxe aurrean. Herritar guztiak zaudete ekitaldian parte hartzera gonbidatuta.

Bide batez, udaletxean egingo dugun bezala, herriko balkoietan ikurrina jartzea eskatzen dizuegu.

ALKATEA

2009ko martxoaren 30eko Udal Agiria:

Apirilaren 6 eta 7an Euskal Herriko Itzulia Ataunen izango dugu. Antolaketa behar bezalakoa izan dadin, denon aldetik ahalegina egin beharrean gaude. Horregatik ondorengo oharrak kontuan izatea eskatzen dizuegu:

1. Aurreko udal agirian esaten genuen bezala, igande arratsaldetik astelehen iluntzera Mediku etxetik hasita eta Tailerreko zubiraino (atzeko bidea) ez da kanpoan ibilgailurik aparkatzerik izango. Karrerako orduetan izan ezik, aipatutako zatian garajeetan ibilgailuak dituztenak sartzeko-ateratzeko aukera izango dute. Beti ere sarrera bezala Tailerreko zubia hartuko da eta irteera bezala bidartekoa.
2. Astelehenean, bai Arrondo aldetik eta baita Kaxeta aldetik ere Urkillagako bidea 13:15tatik aurrera itxi egingo da.
3. Karrera pasatu behar den lekuetan animaliak (behiak, txakurrak, …) behar bezala zaintzea eskatzen da.
4. Kanpotik karrera ikustera etorri nahi dutenentzat antolatzaileek zenbait aparkaleku jarri dituzte. Gainera ordena honetan lekuak betetzen joango dira: lehendabizi, Aitzarte aldea, gero hilerri aldea, hirugarrenik Berraingo zelaiak eta azkenik Zubikoetako soroa. Hauez gain gasolindegian ibilgailua utzi eta herribidetik oinez etortzeko aukera ere hor dago nahi duenarentzat.
5. Datozen egunetan karrerarengatik San Martingo plazako edukiontziak Mediku etxe ondoan jarriko dira.
6. Zortzi eta hamabi urte bitarteko umeek ere txirrinduan ibiltzeko aukera izango dute. Astelehenean eguerdiko 12:30ak aldera San Martingo plazara agertu behar dute bizikleta eta kasko eta guzti.
7. Astelehenean eguerdiko 12:30etatik 13:30etara San Martingo plazan taldeen aurkezpena eta txirrindularien sinadura egingo da.

ALKATEA

Datorren asteazkenean, apirilak 1, Joxemiel Barandiaran Herri Ikastetxeko ikasle, irakasle eta parte hartu nahi duten gurasoek Korrika txikia egingo dute.

Udaletxeko plaza aurretik aterako da lehen taldea eta bidean besteak joango dira sartzen. Ondoren, ikastetxean denok batera testiguaren barruan eramango diren bertsoak abestuko ditugu eta bukatzeko txokolate beroa gailetekin hartuko dugu. Hori bai, edalontzia ekartzea eskertuko genuke.

Korrika 16.  |  Link

2009ko martxoaren 25eko Udal Agiria:

Apirilaren 1 eta 15ean, maiatzaren 6 eta 20an eta ekainaren 3 eta 17an Ataunen altzari, elektragailu eta baliorik gabeko traste zaharren bilketa egingo da. Trasteren bat atera nahi duenak, bezperan eta iluntzeko 20:00etatik aurrera atera behar du. Gainera aldez aurretik trasteak zein puntutan utzi behar diren adierazteko, “Sasieta Mankomunitatea” enpresaren 943-161555 erantzungailu automatikora deitu behar da edo info@sasieta.net posta elektronikoa erabili.

ALKATEA

2009ko martxoaren 25eko Udal Agiria:

Honezkero jakingo duzuen bezala, apirilaren 6an (astelehena) hasiko den Euskal Herriko Itzulia Ataundik aterako da. Lehen etapak hasiera eta bukaera gure herrian izango du eta bigarren etaparen hasiera ere bai. Konkretuki apirilaren 6 eta 7ko etapen irteerak San Martingo plazatik izango dira eta lehen etaparen bukaera berriz, eskola inguruan. Askotan gertatzen ohi den bezala, horrelako gertaera handi batek eguneroko gure bizitzan zenbait eragozpen sortzen digu. Oraingo honetan horixe da gertatzen dena eta horregatik herritar guztiei pazientzia pixka bat eduki dezazuen eskatu nahi nizueke.

Alde batetik, igande arratsaldetik hasita eta astelehen iluntze arte Mediku etxetik hasita eta Tailerreko zubiraino bidea (atzeko bidea) itxita egongo da ibilgailuentzat eta gainera aipatutako tartean ez da ibilgailurik kanpoan aparkatzerik egongo, bertan karrerara datozen talde desberdinetako auto, autobus eta kamioiak aparkatuta egongo direlako. Arrazoi honengatik euren ibilgailua kanpoan aparkatzeko aukerarik ez dutenek, Bikoitz eta Iztatorzar etxeen artean dagoen soroan utzi ahal izango dute ibilgailua. San Martingo etxeen artean dagoen soroan utzi ahal izango dute ibilgailua. San Martingo plaza ere igande arratsaldetik astelehen iluntzera arte ibilgailuentzat itxi egingo da.

Beste aldetik ziklisten karrerarengatik astelehenean zenbait momentutan errepide nagusia ere itxi beharra egongo da. Gutxi gorabehera goizeko 11:00etatik 14:30etara eta arratsaldean 16:30etatik 18:40etara hain zuzen.

Gure herritarrentzat modu honetako kirol ekitaldi batek duen garrantzia kontuan izanda, eragozpenak ulertuko dituzuelakoan jaso ezazue gure esker ona.

ALKATEA

Argazkia: Andoni Munduate (Flickr).

Kaixo bisitari eta ongi etorri blog berri honetara.

Aurkezpena gehiegi luzatu gabe, gauzatxo batzuk azaldu nahi nituzke:

• Blog hau Atauni buruzko berriak era independente eta anitz batean azaltzeko sortu da. Ez dago inolako erakunderi lotuta eta ez du inongo diru-laguntzarik jasotzen. Etorkizunean ere horrela jarraitzeko konpromezu irmoa dugu.
• Edukiak borondate handiko jendearen lanari esker emango dira argitara. Pertsona horietako bat izan nahi baduzu, gurekin harremanetan jarri besterik ez duzu eta egingo dizugu tartetxo bat noizean behineko ekarpenak edo lankidetza egonkor baten bidez. Hau ez da blog itxi bat, ez irakurleentzako ez eta idazleentzako ere: nahi duenak parte har dezake.
• Iturri ezberdinetatik jasoko ditugu argitaratutako berriak. Iturri horietakoren bat ordezkatzen baduzu eta behar bezala erabiltzen ez dugula iruditzen bazaizu, esan besterik ez duzu eta akatsak zuzentzen saiatuko gara berehala.
• Blog gehienetan egin ohi den bezala, honetan ere irakurleek beraien iritziak eman ahal ditzakete. Horretarako iruzkin edo comment-ak erabil ditzakezue. Blogaren kudeatzaileek izango dute, dena den, egokiak iruditzen ez zaien iruzkinak ezabatzeko eskubidea. Ez da inolako jarrera ezegokirik onartuko, baina ahal den neurrian adierazpen askatasuna errespetatzeko konpromezua hartzen dugu.

Besterik ez oraingoz. Mila esker zuen bisitagatik eta ongietorriak bitez zuen ekarpenak.

Laster arte.

Andoni Munduate Dorronsoro
Ataun.info-ren kudeatzailea